الفنانة التشكيلية شيرين رجب فى حوارها مع مجلة الوطنية : لم أخجل من عرض موهبتى والخطوات الجريئة في الفن التشكيلى هى من جعلتنى فنانة تشكيلية
حوار – مريم زهران
هي فنانة بدرجة انسانة تعلمت الرسم منذ نعومة اظافرها أبدعت وهي صغيرة حولت ‘ الشخبطة’ على جدران غرفتها الصغيرة الي إبداع. سرحت بخيالها الي ما وراء الطبيعة فأخرجت لوحة فنية تحمل معنى العبقرية الحقيقية حتى وصلت إلى قمة الفن التشكيلى وصار لها مولودا هو الأول في عالم الفن التشكيلى وهو معرضها الأول الذي سيتم افتتاحه غدا الخميس بدار الأوبرا المصرية معقل الفن والابداع مجلة الوطنية حاورت شيرين رجب الحاصلة على ليسانس الآداب انجليزي والتى توجت مجهودها الدراسي كما توجت قدرتها على الإبداع والفن بالحصول على ماجستير إدارة الأعمال.
فكان هذا الحوار الذي كشفت فيه منذ الصغر عن موهبتها الفنية :
امتى اكتشفتى موهبة الرسم ؟
– منذ صغرى يلفت نظرى الألوان ، فلدى الكثير من الافكار لإعبر عنها ، وفى فترة الطفولة والمراهقة كنت بحضر ورش رسم فى ساقية الصاوى وعند الفنانة الكبيرة فريدة درويش .
من هو اول من تبنى موهبتك ؟
-اول من تبنى موهبتى هو الفنان السكندرى خالد رجب ، تتلمذت على يد الفنان محمد الازهرى
ازاى بدأتى خطواتك الاولى فى خوض مجال الفن التشكيلى ؟
انا اتعلمت الأسلوب التأثيرى ، وحاولت استخدام الالوان للتعبير عن افكارى الخاصة ورسم مشاهد من الحياه أفسرها حسب رؤيتى لما حولى من أشياء وتعلمت التجريدية على يد الفنان محمود بدارنه .
فاكرة اول رسمة ليكى كانت بتمثل ايه ؟
اول حاجة رسمتها وانا صغيرة كانت عبارة عن كتيب به أزياء وعملت صيحة موضه كمان ساعتها .
مؤهلك الدراسى ” ليسانس اداب انجليزى وماجستير فى ادارة الاعمال ” مخلكيش ترجعى خطوات عن خضوك واستمرارك فى العمل فى الفن التشكيلى رغم اختلافهم الكلي ؟
لا ابدا انا دراستى كانت مختلفة ولكن لم تجعلنى اترك الفن وانا صغيرة دايما كنت بحب اشارك فى مسابقات الرسم فى المدرسة القبطية ” رمسيس كولدج ” التى تعلمت بها ، وهى ما جعلنى لدى مقتنيات بتلك المدرسة .
محستيش انها خطوه جرئية تمسكك بالفن التشكيلى رغم حصولك على ذلك المؤهل ؟
من غير الخطوات الجريئة لن نصل الى النجاح واهم حاجة نعمل اللى علينا وبنحبه ونتوكل ولا نتواكل .
كبرتى مشروعك ازاى ؟
اشتغلت على نفسى جامد جدا وفضلت ارسم ولم اتوقف لحظة وطرقت كل الابواب ولم اخجل من عرض موهبتى .. طلما الواحد مؤمن باللى بيعمله .
هل فى ابواب رفضت شغلك ؟
طبعا قابلت حالات رفض كثيرة جداً ولكن اتعودت انى اتقبل الرفض واحط فى دماغى اللى هيرفضنى دلوقت بكرة هيجى يطلب يشوف لوحاتى
شوفتى ازاى دعم الناس اللى حواليكى ؟
الانسان الحقيقى هو اللى بيفرض نفسه وكان فى دعم كبير من ناس حقيقية بتحب الفن وعارفة تفرق بين الفن وحاجة تانية .
ممكن تكلمينا عن مشاركتك فى معرض كايروا ؟
هو المعرض هيقام فى دار الاوبرا وبالتحديد فى محمود مختار وانا عاملة فيه حالة فنية جديدة مستخدمة الالوان للتعبير عن حبى لاحياء القاهرة ومدى جمالها اللى تايه وسط الزحمة .
ده المعرض الكام ليكى ؟
ده المعرض رقم 8 ليا وشاركت فى العديد من المعارض الجماعية والفردية وخاصة بمدينة شرم الشيخ وعشت فيها عشرة سنوات .
وهل من ضمن المعارض دى كانت جوة الاوبرا ؟
ايوة انا شاركت فى العديد من المعارض بالاوبرا وبالتحديد فى القاعة الموسيقية .
هل شايفة ان فى ناس بتقدر قيمة الفن التشكيلى ؟
ناس كثير بس بالنسبة لعدد سكان مصر مش هنقدر نعتبرهم كثير بس بالنسبة لعدد سكان مصر مش هنقدر نعتبرهم كثير بس بالنسبة لعدد سكان مصر مش هنقدر نعتبرهم كثير ولكن اللى مفرحنى ان الاهتمام بالفنون ابتدى فى الزيادة من قبل الشباب .
هل لسه فى إقبال على تلك المعارض ومين اكثر الفئة ؟
فى اقبال لأن الاهتمام بالفنون زاد طبعا اكثر فئة هى المثقفه والمحبة للفنون وزمان الناس كانت اكثر ثقافة وتقدير للفن لكن اللى مفرحنى الفترة الاخيرة ان الشباب ابتدى يهتم ويقدر ويفهم الفن .
اخر سؤال وبكده يكتمل حديثنا مع حضرتك الفن التشكيلى بيمثل ايه فى كام كلمة ؟
حياه .. سعادة .. امل فى بكرة
